大漠 (Closed)

女友嚟接收工後，係土瓜灣一帶搵食。路過北帝街見到呢間新疆料理，女友二話不說拉咗我入去。女友本身有少少新疆血統，好鬼鍾意食孜然味嘅嘢，我唯有奉陪喇（雖然佢話叫我隨便揀）咁揀咗幾個菜啦，羊奶芝士花竹蝦、涼拌豆腐、鎮店清真古法烤羊架。一嚟當然嚟咗個豆腐先啦，開下胃先。豆腐都好滑，加埋啲汁同花生碎去食口感味道的確係幾好。老闆都幾好人，豆腐上嚟之後我再攞咗佢好多芜茜（我太鐘意佢嘅香味），老闆都無托手肘，加埋啲芫茜，成碟嘢即時好味咗再講隻蝦喇，出面炸得好脆好香口，值得贊嘅係我本身諗住芝士會kum咗蝦嘅鮮味，但是令我出奇嘅係芝士嘅味又真係恰到好處，食落去依然食到蝦嘅鮮甜味，抵讚！最後當然就係羊架喇，自己睇相都見到嫩口多汁喇，加埋呢間嘢自己可以落孜然粉（檯頭有個調味盒），多少自己調教，真係好正。見到羊架應該係烤同燒過，熟度同口感都相當唔錯，爆多汁。呢間鋪上菜都好快，啲嘢全部熱luck luck 上檯，相信出面都好少有。另外老闆都健談亦相當好客，會招呼客人及問食客嘅意見，走嘅時候送咗兩個羊奶凍做甜品，一樣好好味。anyways，一定會再去（除非會唔去）。