未上菜前有碗麻油豆腐絲。味超重麻香味，凍凍地又幾開胃。
隨變雞煲－半隻(微辣)。雞肉量頗多，肉質入口嫰滑雞味濃郁，就算滾耐咗都唔會變得過老。
配料嘅紫洋蔥同樣入晒味同甜，用黎做湯底一流。雖然係麻辣但味道唔會太重，將湯水維持係一半個味道就剛剛好，唔會辣到不停飲水。中間煮到一半，侍應又好細心咁添加高湯，都算唔錯。
脆炸響玲。比平時食開嘅細碌嘅，但超級鬆脆，輕輕浸腍入麻辣湯度，十分惹味。
手切本地肥牛(大)。牛肉開蝴蝶邊而且厚身，所以要灼耐多少少。但肉質非常軟腍又重牛香味。
因為油花不多，所以灼完依然大片而且容易控制生熟度。有時就係怕打邊爐掛住傾偈，灼過龍會縮埋小小一片，嘥咗。
招牌有餡三色丸。分別係黑松露墨魚滑／咸蛋豬肉丸／鵝肝蝦滑。三款配搭都幾新穎，味道都唔錯。
尤其係鵝肝蝦滑一咬入去鵝肝油爆晒出黎，鐘意鵝肝羶味嘅朋友一定不能錯過。
隨變粉。似係闊身嘅河粉混合薯粉，口感煙韌彈牙，用個筲箕載住放入麻辣湯度煮熟，食落又香又麻，加少少湯食好正。
蜂巢豆腐／鮮蝦雲吞／魚腐。用黎試真湯底味道一定要柯打呢個豆腐，蜂巢狀嘅空洞吸晒湯汁味道，又香大麻又辣。
而雲吞好大粒每隻都有兩三粒蝦仁係入面，肉餡調味啱啱好，雲吞皮吸埋辣湯味道，有啲紅油抄手嘅風味。
食完咁多肉，當然要食返啲蔬菜平衡一下健康，油麥菜係不二之選。
新一年希望兩個朋友都好似呢度嘅火鍋咁，隨變隨意。展開人生新一頁！
