餐廳位於2樓，驟眼睇位置唔算好多，尤以大枱為主，枱與枱間空間感足，環境唔錯，坐得舒適。
細看之下先知原來佢地設有獨立房間，裝潢都幾有心思呢，廳房以學校為主題命名，例如電腦室、體育室等。
特別係頭頂嘅大燈，木桶造型都幾特別。
一出lift門已經好快有店員招待，而且聞到好香雞煲味，原來3位以上可以先享用雞煲再轉湯底打邊爐，都有唔少火鍋店走呢個路線而好成功。
仲要見到佢地9:30pm開始會做8折，$228就食到半任食火鍋，免加一、醬油，真係抵。搵日收夜要再黎試下。
因為我地選擇食小菜，所以店員都好細心，幫我地拆走電磁爐，以免阻礙。
餐紙上印有關於新南苑嘅小小背景，係以前觀塘仁愛圍最旺嘅食肆，後來因為重建以結業，輾轉經歷時間，又再喺旺角開店。
小菜選擇不少，部分菜式例如鵝掌、花膠海參等，需要一日前預訂，另外中式小菜、炒飯麵飯都有供應，定價中上。
食小菜嘅客人佔少數，即叫即炒，但都唔洗等好耐已經上菜。
另外店員都送上熱茶，見賬單上並冇收取茶芥~
用嘅係透明茶壹，有個好處，店員會不時留意住，會主動加水，對服務好滿意
菜膽上湯雞 (半隻) $138
上湯雞做得相當出色
雞肉啖啖肉，肉多骨少，而且非常滑溜，雞胸位都可以接受。雞皮睇落晶瑩，食落唔肥唔膩。上湯唔會太稀，微微稠身，沾上雞肉，調味適中，加上有菜膽伴碟，食落帶甜。雖然另外附上薑蓉，我覺得單食都好夠味。
（實在食過太多上湯雞鞋到冇朋友，所以對呢道菜好滿意。）
蛋黃黃金蝦 $148
花多眼亂之下，想食蝦，喺油泡大蝦球、茄汁生煎蝦、黃金蝦中糾結…最後男朋友揀左後者，因為平時自己唔會煮，哈哈。
確係另一推介之選！
蝦嘅size夠大隻，蛋黃平均沾滿蝦殼上。淨係聞到都好香，急不及待要食。
蛋黃味道香濃，但食落完全唔會鹹，配埋爽口彈牙蝦肉，夠新鮮，食完一隻又一隻
西蘭花炒帶子 $148
西蘭花炒帶子其實冇乜花巧可言，但味道都屬中上。蘭花保留爽口口感，帶子夠新鮮，點炒都唔會唔好食
沙嗲炒牛肉 $138
炒牛肉都以芥蘭墊底，有菜有肉，而且給得大方，菜嘅份量不少。
牛肉夠嫩腍，炒得入味，加上有少少彩椒、沙嗲醬，幾惹味，送飯之選
不過當日坐正冷氣位，加上大部分人食火鍋，可能冷氣較大，都有少少凍，食完飯都冇特別坐好耐就離開。
叫埋單之際，店員話有個甜品送
哈哈，見對面食火鍋埋單前有食，仲以為食小菜冇份奶凍
呢個奶凍好正
奶味重，而且夠滑，臨走同店員講聲話奶凍好食，佢話係3.6牛乳做嘅~難怪！
整體黎講，雖然主打火鍋，但小菜都相當唔錯喎，幾有水準。環境唔錯，坐得好舒服，有機會同朋友黎都會訂房食火鍋！服務都合格有餘，比好多任食火鍋，中菜館好。
近門口位嘅調料區：
餐牌：
