深井陳記燒鵝海鮮酒家

Open Now

Now Closed

星期日難得放假，總會瞓飽先起身，今日都唔例外，天氣又凍凍地，特別好瞓，起身已經差唔多兩點，原來已經噤晏，唔怪得噤肚餓。嗱嗱聲同朋友去咗陳記燒鵝食嘢，平時我都會食燒鵝瀨粉，但今日見到隔離枱食炒粉麵，好似好正，所以就轉咗口味，叫咗個味菜牛柳絲炒麵，係等個陣，聽見廚房炒緊嘢，好似好有鑊氣噤，好期待快d有得食，等咗陣，鑊氣十足嘅炒麵有得食啦，好大碟，面頭好多餸，味菜酸酸地辣辣地，又爽口，好好食，牛肉就正常，無太特別，但都ok，不過牛肉就少咗d，而我最鍾意就係炒麵係炸過，入口好脆，好香，炒麵配埋茨汁有d濕濕地又唔會好乾，食吓食吓成碟食清光。朋友叫咗豉椒牛肉炒麵，個樣都好吸引，豉椒加埋洋蔥青椒一齊炒，好鬼惹味，朋友都話好好食。食完一大碟炒麵，真係要慢慢行散吓步先返屋企，如果唔係真係肥死人。