第一道嚟嘅係生蠔。一盤六隻上枱，size算係中等啦，唔係話超大隻，但望落都幾飽滿。食落口海水味幾突出，質感都幾creamy同爽滑，感覺幾新鮮。配咗啲紅醋乾蔥汁同檸檬角🍋，唧啲檸檬汁上去，更加帶岀生蠔嘅鮮甜味。作為開胃前菜，表現算係唔錯，穩穩陣陣咁啦。👍
主食我哋揀咗呢個貓耳朵粉。平時比較少食貓耳朵粉，見到餐牌有就試吓。呢碟意粉份量都幾足夠兩個人share。貓耳朵粉煮得啱啱好，口感煙韌有咬口，al dente嗰種感覺做得幾好👌。個醬汁係用蒜片、辣椒碎、白酒同海鮮去炒嘅，蒜香味好突出🧄，加埋少少辣椒嘅惹味🌶️ (辣度好輕微，唔食得辣都ok)，再滲住淡淡白酒香，成個配搭好開胃。海鮮有蝦、蜆肉等等，都算新鮮彈牙。整體嚟講，呢碟意粉味道平衡得幾好，我同男友都清咗成碟，覺得幾滿意。😋
終於到戲肉啦！我最期待嘅甜品出場！🤩 呢個阿拉斯加焗雪山外型真係幾搶眼，成個山仔咁，外面鋪滿咗火炙過嘅蛋白霜，帶啲焦糖色。侍應仲會喺枱邊淋上酒再點火🔥，個藍色火焰效果真係好有睇頭，相機食先是常識吧！📸 切開之後，外層暖暖地又輕飄飄嘅蛋白霜，包住入面冰凍嘅雪糕（好似係雲呢拿味？）同埋底層嘅餅底/蛋糕底。一啖食落去，冷熱交融嘅感覺好有趣，蛋白霜甜度啱啱好，唔會死甜，質感好似棉花糖咁☁️，配埋清涼嘅雪糕一齊食，口感好豐富。作為今餐嘅主角，佢絕對交足功課，成個體驗好好玩！🥳
食物質素都幾穩定，味道有返咁上下水準。最重點嘅阿拉斯加焗雪山 果然冇令我失望，視覺效果同味道都滿足到我嘅期望👍。
