呢日就嚟到位於大角咀利奧坊嘅東京大眾酒場～
餐廳入面有條好大碌嘅柱，但餐廳就請咗本地artist為呢條柱加添生氣～
幅畫好靚，大家嚟到都一定會比佢吸引到。真係估唔到成幅畫都只係由一個人畫成！
天花掛咗好多燈籠，好靚
有個大電視，播住日本電視節目～
餐廳嘅枱櫈好有特色～係用擺可樂樽個箱整成嘅～
不過張枱就有啲頂腳，坐得唔係好舒服🙈
睇下menu先～
2
坐低咗就可以出去揀自己想食嘅關東煮，再自取飲品，返埋位坐低食嘢，等其他嘢食到～～
調味角～
呢度都有幾多調味料～
有芝麻、醋、餃子豉油、辣油～
坐低咗之後就會有杯雞湯俾你，話係可以潤下喉嚨～
我就覺得有啲太鹹～～
食物講求色香味俱全，「色」排頭，可想而知食物嘅外貌係好重要嘅～
而呢度就正正做到所有食物嘅樣貌都好好
關東煮（$12/$18@）
所有item都係$12/$18@～
我哋最鐘意就係佢個湯底！超超超好味～
玉子福袋（$18）
日本魚肉包心燒賣（$18）
最推薦嘅有玉子福袋同日本魚肉包心燒賣～
出面比較少見，幾特別～
玉子福袋入面嘅口感煙煙靱靱，有啲似稔少少嘅年糕，我好鍾意～
而個燒賣嘅味道都好特別，一定要試下！
信州白提子梳打；完熟桃子梳打（$28@）
飲品都有好多選擇，我哋就揀咗呢兩樽～
好味！飲完會想出去自己買嚟飲！
除咗關東煮之外，我哋仲叫咗個美人鍋同一啲串燒～
食食下關東煮就上咗個美人鍋喇～
店員會定時過嚟睇下個鍋得未，得就會通知你地食得架喇～
美人鍋（$188）
因為個鍋入面有超多骨膠原，所以先叫做美人鍋～
湯底係好濃嘅雞湯，越熬越入味，而且唔係味精湯，係好清嘅，所以不斷飲都唔會搞到你好口渴～
雞件煮得啱啱好，唔生又唔老，好食
仲有好多好多嘢菜，食完呢個覺得自己好健康😂
至於備長炭燒物，我哋都嗌咗唔少！
備長炭燒物（$15~$18@）
又係上碟好靚嘅～
廚房其實會燒好先攞出嚟，但餐廳都會將串燒擺喺個迷你爐上面熱住佢，好貼心～
嚟緊天氣會更加凍，呢個做法就可以令啲嘢食擺幾耐到係咁熱辣辣啦！
黑毛豬腩串（$18）
其實全部串燒都好好味，調味好好。
我最鍾意嘅就係呢個黑毛豬腩串，唔肥唔瘦，面頭嘅鹽同黑椒同豬腩嘅配搭又好！
總括嚟講，好鍾意呢間餐廳，嘢食又靚又好味，而且價錢仲好實惠，再多啲人share再平啲添！
有機會一定會帶朋友嚟試下！
除咗大角咀呢間分店之外，仲有尖沙咀店，可能會方便啲～
而且服務亦都好好，好鍾意呢度嘅員工，佢哋會比客人feel到佢哋對工作嘅熱情！
佢哋仲好貼心咁比橡筋客人紮住頭髮，唔駛吸咁多味
另外，呢到日頭係做拉麵嘅，都可以嚟試下呀
