🍽蒜片牛柳粒
見menu推薦就叫左呢款前菜，牛柳粒肉味濃，大部分無渣，加埋炸香口嘅蒜片一齊食唔錯。
🍽是日例湯
當日係海底玉米龍脷葉煲豬腱，睇個湯嘅顔色就知足料，加左玉米、蘿蔔同海底椰非常清甜，娘親話龍脷葉有止咳潤肺嘅功效，轉天氣飲啱曬。
🍽砂鍋涼瓜豉蒜炆頭腩
一開蓋就聞到好香嘅蒜頭豆豉味，魚肉無腥味又嫩滑，無骨方便食用，砂鍋令外皮焦脆，微苦嘅涼瓜索曬汁，好食。
🍽顏府秘制一字骨
賣相好似西式ribs咁，咬落好淋，入口即溶，似東坡肉嘅質感，店員介紹個汁係師傅秘制嘅燒肉汁，再濃少少會更好，但肉質真係好正！
🍽砂鍋大澳蝦醬啫啫唐生菜膽
我地眼闊肚窄叫左太多肉，最後黎返個菜，一開蓋真係有嗞嗞聲，蝦醬味濃但唔會太鹹，仲有大大隻蝦乾，唐生菜膽爽脆，菜頭唔會過硬，油左少少但味道好出色。
雖然價錢唔平，但同食物質素成正比，而且每碟分量都頗大，屋企人話可以encore。
