味道樂居酒屋 (元州街) (Closed)

喺長沙灣返工，收工自然周圍覓食下，點知比我發現有一間位於大街大巷嘅居酒屋🏮，我哋就即刻入去醫肚。餐廳裝修環境好日式化，而且以木為主，入到去幾乎爆滿了，好彩時間剛剛好，唔使點等位。深海池魚王刺身薄切成多塊，份量都幾多，而且上面鋪滿蔥粒，點中間提供嘅醬料，味道酸酸地好開胃。壽司方面有我最鍾意嘅火炙左口魚邊壽司，兩件賣相非常吸引，而且好香嘅火炙味道，食落去簡直有入口即溶嘅口感，非常Creamy。除此之外，仲有蟹膏壽司🍣 。不得不讚嘅係迷你三文魚籽甜蝦蓉DON，賣相非常精緻，細細杯，但係刺身嘅份量比較多，每人食少少都已經好滿足，甜蝦蓉好少可以喺出面嘅餐廳食到，而且食得出好鮮甜嘅味道。小食同埋燒物方面，分別有芝麻雞翼、汁燒大白鱔、鹽燒厚切特上牛脷同埋流心芝士魚餅等等，每一款都好新鮮美味。餐廳嘅招牌菜就係特上原條成田鹽炭火燒鰻魚飯，都只係＄128一份，而且份量好多，鰻魚真係有我手板再大啲啊，勁有份量。食落去鰻魚無骨，魚肉好入味，而且肉質鮮嫩，果然係鎮店之寶。呢間居酒屋喺長沙灣區算是數一數二的日本料理，朋友們經過，我都必定要推介佢哋試吓先得。