木船 (Closed)

本人係泰國菜既fans，得知大埔太和美食林立既居地方開左間泰菜叫木船。今次有機黎到呢區，梗係第一時要報個到打個卡啦。中午時份人頭湧湧，有OL，有學生有一家大細，等左成15分鐘先入到去。一入到去見到餐廳既木版裝潢，好似入左隻木船食飯。 由於新開張，侍應好熱心咁介紹我試下佢地既招牌菜：豬脾飯。另外，我再叫左泰國維他奶，泰式炒通菜同埋春卷。首先黎既係春卷，有3件，d網紙炸得好脆好香口，內面又足料，整體感覺唔錯又好味，而且仲伴有泰式甜酸醬，係個非常開胃既前菜。 跟住黎既就係泰式炒通茶，分量好大，微辣，唔咸唔油膩，夠哂惹味，正再黎既係主菜豬脾飯，有半肥瘦既豬脾，滑得黎又啖啖肉，有種入口即溶既感覺，仲配有蕃茄，雞蛋，芥蘭同酸菜，健康得黎又不失泰式菜既風味。我最鍾意既都係佢秘制豬脾醬汁，非常好味，有別於其他既豬脾醬。至於泰式既維他奶，我係第一次飲，係偏甜既，不過愛好甜品既我就覺得啱啱好。鍾意泰國菜既朋友仔黎開大埔太和，記得去登呢隻木船醫肚嗱!