近排朋友飯局，想搵個地方可以同時滿足燒肉癮同打邊爐癮，最後揀咗銅鑼灣謝斐道呢間「熊本燒肉」，主打一個價錢有齊兩種體驗。
我哋試嘅係 $268「120分鐘精選澳洲和牛燒肉火鍋放題」。以呢個價錢喺銅鑼灣區，有和牛任食，燒肉加火鍋，算係幾有競爭力。
火鍋湯底我哋加$58轉咗個 「黃金粟米湯」，拼免費嘅豚骨湯。粟米湯味道偏甜，幾濃郁；豚骨湯就正常發揮，用嚟涮肉唔錯。
加 $88/位 任食生蠔、鵝肝蝦片、和牛他他及十款刺身 ，味道尚算新鮮；鵝肝配蝦片，口感幾特別。
另外兩位以上會送 「原條鰻魚壽司」，賣點係飯量極少，可以留肚食其他嘢，呢點幾細心。
因為訂位時有備註係慶祝週年紀念，餐廳送上一個 PC狗畫碟甜品，碟上亦寫住 "Happy Anniversary"。畫功幾得意，適合打卡，算係一個幾有心思嘅服務。
