大喜屋 (Closed)

同先生行完Sogo就過對面馬路既銅鑼灣黃金商場搵食，望望水牌最後上左7/F食大喜屋放題。暖暖身首先食鍋人蔘雞湯，可惜人蔘味欠奉，雞肉大件有肉，但味道較淡。刺身食左大蝦、北寄貝、榮螺肉、象拔蚌、油甘魚、帶子片。睇色水都已經覺得夠鮮，同埋食落夠凍口感加分。呢款牛油果軟殻蟹壽司幾好味，軟殻蟹夠脆又唔油，牛油果香滑健康，沙律醬同蟹籽增添味道。羊架有驚喜，肉唔太蘇而且夠稔，用黑椒燒過都幾香。日本蕃薯清甜易食，次次放題都會點嚟食。天婦羅食左紫薯同南瓜。紫薯好大舊又甜，我幾鍾意食，但略嫌南瓜太油。燒菠蘿唔係間間燒得好，呢間燒得唔錯，每片都厚所以唔易燒乾。多汁又甜，唔錯。甜品食左焗西米布丁同牛奶布丁。牛奶布丁唔太甜淡淡地唔會膩。焗西米布丁甜度適中，好似甘細細件就岩岩好。之後店員比多張甜品紙我地，原來有每人限定叫一客既雪糕。我地揀左沖繩海鹽雪糕，貪佢夠特別，出面少有d。最後埋單每人$248+10%。