[菠蘿咕嚕肉]
呢道菜真係好有驚喜，上盤後幾乎忘記左自己係素食餐廳，咕嚕肉食落去估唔到食得出肉的口感，材料除左用上面根外，應該係加左猴頭菇，令到食落去會有彈牙同埋豬肉半肥瘦的感覺。醬汁調得好好，唔會過酸，食落去好舒服。
[荔芋香酥鯽魚]
呢道係功夫菜，外皮唔厚，炸得香脆而唔油膩。內裏的芋頭質感做到芋泥，有軟檽的感覺，令到食落去的質素更加似魚肉。
[蜜汁素叉燒]
素叉燒份量都多，呢款「豬肉」又同咕嚕肉唔同，食落去會更有咬口同肉類撕開的口感。沾上蜜汁食落去甜甜地，係幾好的開胃菜。
[上湯有機蕃薯苗]
呢道菜望似普通，但有兩個重點做得好。其中係上湯飲落去好有內涵，應該落左唔少材料烹調。其二就係蕃薯苗好驚食到有渣，但呢度用上嫩綠的蕃薯苗。
總括黎講，功德林素食運用「素食葷燒」的烹飪技巧，幾乎可以以假亂真，以為真係食緊葷食。作為食客，尤其係咕嚕肉，真係好有驚喜! 另外除左神似外，味道水準都係有質素，係選材同煮法方法明顯見到出心思，雖然知道食緊素菜，但比起「大魚大肉」一餐黎得優雅精緻，更加滿足。
