望望早餐有什麼選擇，真係太多喇麻，花多眼亂，我只不過算食個麵餐啫。難得有福麵供應喎，細細個已好鍾意食福麵，雖然今時今日味道及質感都變晒。今次特別地唔轉出前一丁，要福麵試試先。
太陽蛋牛扒福字伊麵，好少茶餐廳早餐有牛扒食架，一定要要試啦。有得食都未必好，醃得過份，乸到肉質腍劈劈又滑嘟嘟，味道同口感都超怪獸囉。讓冷冰冰既太陽蛋係熱騰騰既湯汁暢泳幾分鐘，吸收足夠熱能才一啖塞入口，暖笠笠蛋漿係口中爆開，好舒服啊 ﹗
太陽蛋豬扒福字伊麵，到依刻先知道采華只供應福麵，無出前一丁或公仔麵架，如果扒麵要多隻太陽蛋仲要加多 5 蚊添呢 ﹗豬扒食到我要咀妙妙，架硬食埋去 ﹗乸到肉質軟撻撻又滑澀澀，味道無咩問題，係口感好可怕左少少。湯底好淡又好清，無咩味道呢，唯一可以讚既係贈送生菜幾片，爽甜鮮嫩，多謝多謝。由於個湯底實在太淡，都係要落一大羮辣椒油救命，但係辣椒油都不香不辣，幫助不大，仲搞到湯汁油淋淋 ﹗
太陽蛋雞扒福字伊麵，看似個湯底會淡荗荗，又唔係喎，好香濃喎，合格。唓，炸雞扒黎既，我要煎雞扒呢。炸到外層又乾又硬，裡面就無咩問題，肉質都仲好嫩滑，肉汁豐富又水潤添。
太陽蛋腸仔沙嗲牛肉福麵，又係大陸怪味腸，救命 ﹗不知道如何形容依股味，有點霉有點腥有點益，唔係豬唔係雞，唔知咩味。沙嗲牛肉煮理得宜，滿意。不太硬不太鞋，醃味不嗆而帶甜。合格。福麵就腍左少少，都係一早煮定麵底再加湯既出品，腍劈劈又唔夠熱，泡麵溫度，失望。
太陽蛋紅腸五香肉丁福字伊麵，湯底又稀又淡又水汪汪啫！最好食又有質數既福麵只有大埔華立！五香肉丁都有瘦肉食下，無咩肥膏，good ﹗炸紅腸油淋淋，乾身一點好嗎？
是日例湯，我真係唔知咩湯喎，豬骨粟米湯掛，清清淡淡唔難飲。咖哩牛腩飯炒底，炒飯底算滿意，味道香口有蛋味，乾爽飽滿有鑊氣，係厭蛋少啫，仲落埋蔥炒喎，好少餐廳會咁做，讚。
咖哩淺黃色既？好稀又水汪汪喎，薄衣衣唔夠厚唔夠黏身，師傅失手？味淡不香不辣不滑，再次好失望。牛腩醃味濃，炆得腍身無渣兼鬆化。雖然個咖哩無咩味，幸好係炒飯底，連飯帶腩塞入口，食味不俗。
