龍璽酒家 (Closed)

上兩個禮拜，公司特別宴請由台灣黎香港既貴賓，有幸跟老闆可以去香港最高既ICC 101食lunch。第一次去到咁高樓層既地方食飯真係好高興，仲要係去食高貴版龍皇 -- 「龍璽酒家」添! 只可惜當日大霧到乜景都睇唔到，我地坐 window seat都係無用。慘 ~ 我地預先點左個餐，前菜每人有兩碟點心，有石蠔春卷、花膠卷、黑松露粉果、咸水角、叉燒、三層肉、海蜇頭等等，每人一份，每樣少少，當中最like係個粉果，加左黑松露真係特別香，海蜇頭擺到好似玫瑰一樣好靚，其他就係龍皇一般既水準，都好味，但唔算好特別。之後既燉魚皇湯就特別每人有一個小鍋熱住，好貼心。砵酒焗石蠔炸得又脆又鮮味，最後上菜既海蝦貴妃泡飯大家都超鐘意，加左脆米好好咬口又好味，正 ~ 要一讚既係d服務員態度好好，我一起身已即刻行埋黎問我係咪去洗手間，讚 ~ 總括黎講，食物質素ok，但食物份量只係剛剛好足夠我地女士去食，如果同枱有男士，可能唔夠飽咯 ~~ 所以最適合請客食飯。