眼見餐廳都有唔少外國人食飯，所以餐牌都好貼心咁附上中英版本。有部分侍應只係用英文溝通，不過服務就好殷勤同貼心！餐牌唔算太多選擇，但係「貴精不貴多」嘛！
餐廳有少量bar枱位，可以望住bartender調酒，特別係啲好靚嘅cocktail。餐廳仲有幾款本土啤酒可以揀，值得支持！
避風塘雞翼 ($88)
雖然鋪咗勁大量辣椒碎同埋炸蒜，但又唔會好辣，反而仲好惹味！雞翼炸得好脆同juicy，好食！
½ 葡式香辣燒春雞配薯條 ($168)
半隻嘅葡式燒春雞都好大隻，雞皮燒得好脆，肉質亦唔會好嚡，蘸埋醬汁就再入味啲。至於配菜－粗薯條，因為我本身鍾意粗身薯條，所以就啱晒我喇！糝喺面嘅辣粉好惹味，但薯條份量實在太多，真係食唔晒⋯⋯
蟹肉香草忌廉扁意粉 ($158)
蟹肉份量超級多，差唔多啖啖都係鮮甜嘅蟹肉！扁意粉幾掛汁，唔錯！
Hungry Donut ($88)
佢係其中一款「香港製造」嘅啤酒，飲落好香麥味同埋花味，好好飲！
