大井町日式放題 (Closed)

同朋友仔都好喜歡食放題，呢日喺荃灣買完嘢，就揀咗呢間位於荃灣眾安街嘅大井町晚飯。餐廳環境好闊落，我哋被安排坐喺卡位度，位置闊落坐得舒服。自助區有沙律、冷盤海鮮、甜品、飲品同雪糕，其中仲有清酒同梅酒可以揀。點餐紙上邊有好多種類嘅食物。先點刺身，甜蝦、帶子、北寄貝，中拖羅、赤蝦，油甘魚……味道鮮甜，款款都唔錯。試晒咁多款火炙壽司，質量都好高，其中最喜歡火炙蒜香汁燒和牛，牛味濃郁，牛肉嫩滑，必試！手卷類都有好多選擇。燒物類有九款選擇，我哋試咗其中嘅燒菠蘿、塩燒鯖魚、雞翼同雞軟骨串，呢幾樣都幾好食。日式放題點少得天婦羅，揀咗其中比較少見嘅秋葵天婦羅，秋葵口感黏黏地，面漿都夠鬆脆，我自己就幾鐘意。軟殼蟹卷、和牛卷、辣汁炸蝦卷同青瓜鰻魚反卷，款款都幾高質，必吃！一品料理中嘅地獄辣蜆及豬骨濃湯野菜雜菌煲，都好足料。仲有日式蟹粥，粥底夠綿，味道鮮甜。日式蒸蛋，入邊有蟹柳同冬菇，口感十分滑溜，唔錯！仲有其他壽司、軍艦、炸物、湯麵，鐵板料理類 …… 未食，就已經飽了！最後食埋每人有一客嘅movenpick 或 Dreyers雪糕，為呢餐就個完美句號。😆😆