有錢佬靚粥 (Closed)

每晚回家都會經過呢間粥店，不過每次都係怱怱而過。適逢今晚星期六，難得悠閒就試吓。店員介紹了夏日系列，包括三款冷麵同三款冰碗甜品。心諗咁奇怪嘅，粥店賣呢啲...一心準備食粥，但係盛情推介之下，決定試吓新野。都好既，起碼唔會食到汗流夾背。三款冷麵之中，揀咗蒜醋撈薯粉。配料唔算好多，有火腿絲、木耳絲、青瓜絲同紅椒絲，鋪係麵上。紅薯粉用蒜蓉同黑醋拌勻，聞落好香，食落酸甜，幾開胃，加上個粉好煙靱彈牙，口感幾好，而且份量都幾多，$28算係咁。食完薯粉，又嗌咗個木瓜雪耳糖水。值得一讚嘅係，糖水用一隻雪到凍冰冰嘅銀色碗盛載(唔怪得叫「冰碗甜品」)，一摸個碗已經覺得透心涼，加分！👍🏻 碗糖水出奇地好味(可能因為事前無咩期望😅)。 木瓜同雪耳都切成細細嚿，煲到軟硬適中，好易入口。木瓜味重，雪耳質地淋滑，配上脆身嘅南北杏，同埋冰凍嘅甜湯，完全係感觀嘅一大享受，大熱天時，真係無得頂呀！！！$20抵食！！👍🏻無諗過粥舖都有咁啱夏天食既野！😊