廣東名門 (Castle Peak Road - Tam Mei)

Open Now

Now Closed

其實book mark咗呢間茶樓好耐，但係實在太偏僻，所以冇打算嚟。今日仲爭冇私家車添，但係突然間屋企人心血來潮話去，咁就喺上水搭車過嚟。咁喺上水搭車過嚟又唔算太耐都係半個鐘頭到，落咗車行過天橋都係5分鐘就到啦。入到酒樓見到佢個格局，突然間諗起三聖邨嗰間廣東名門，咁我就覺得應該同一個老細啦。因為裝修同嗰邊相差無幾。講返啲嘢食先，個燒鵝雙拼套餐幾抵食二百幾蚊有燒鵝叉燒一碟炒青菜同埋一鍋奶粉，個叉燒勁腍滑好有咬口肥瘦均勻。個燒鵝都唔差，仲要係燒鵝髀。整體點心夠熱又好食，個蝦餃皮薄多汁又多蝦肉夠爽口。個魷魚鬚都幾入味個流心奶黃包超爆汁，但係個壽桃就冇想像中咁甜偏淡。當中比較差少少嘅就係隻糯米雞啲餡料真係比較遜色咗少少。所以唔好俾佢點心紙張相呃到，可以唔叫。蛋散夠鬆化，嗰椰皇都幾清甜，值得一試。咁樣食吓，都九百幾蚊埋單，係有少少貴，但大部分食物水準都值得嘅。