I's Corner

Open Now

Now Closed

自從何文田港鐵站開通後，可以有更多機會去土瓜灣一帶搵食，今日經過街角呢間小 cafe，覺得感覺幾舒服，就即管入黎試下。餐廳面積唔大，大約只有廿個位，我地一行兩人七點左右黎到，好彩都唔係太多人，唔需要等位就可以入座。餐牌有多款漢堡包及意粉選擇，亦可以揀全日早餐。香辣蒜香海鮮炒扁意大利麵 :上檯時蒜香味濃郁，海鮮有蜆肉、魷魚圈及青口，相當豐富，意粉口感彈牙唔韌，入口時辣度十足，非常惹味。鐵板雞堡 :漢堡包都幾大個，鬆軟嘅麵包夾住煎雞肉、生菜及芝士，雞肉煎過後非常香口，同蜜糖芥末醬好夾，上菜時餐廳已經將漢堡包一分為二，令客人食得更方便。配菜有即炸厚薯條，熱辣辣相當好味，令我地都忍唔住要encore多一份薯條。黑醋蜜糖雞翼 :雞翼即叫即焗，雞翼皮香脆而肉質嫩滑，黑醋蜜糖味道酸酸甜甜，再加入少量黑椒，令雞翼更香口惹味。餐飲揀咗cappuccino，味道香濃，食飽飽慢慢飲返杯份外舒服。呢間小cafe雖然位置唔太就腳，但感覺寧靜舒適，同朋友黎傾下計就最適合不過。