1
係唔肯定有冇點錯相既情況下黎到，佔地極廣又開揚既場地坐無虛席，令我隱隱帶點期待。 好在book定位，坐低即時怒點刺身先。
三文魚同北海道帶子好新鮮嫩滑又肥美，以此質素如果可以再厚切d，帶子原個片開咁上就完美喇。 珍寶大赤蝦爽口鮮甜，大塊又厚身，絕無欺場。 俄羅斯甜蝦估唔到會好似手指咁粗，食落有彈性唔會粉。 吞拿魚不過不失。
壽司細細件，黑松露赤蝦面頭個督黑松露醬散發出濃烈香醇既煤氣味，同爽口新鮮既赤蝦好夾，必叫。 帆立貝如想像般啖啖肉又清甜；三文魚腩就比較薄，可以不試。
海膽手卷單睇色澤竟然有幾分似我係日本食到既靚海膽，味道新鮮香醇，餘味帶甜。 最感人既係原來手卷飯量得一啖仔，香脆既紫菜底部原來空心，莫名地好開心。
1
御品鮑汁燴花膠絕對係誠意之作！ 花膠炆得軟腍入味，雖然唔係頂級花膠，但大大塊、厚身又彈牙，忍唔住encore左幾次。 鮑汁調味咸淡得宜，連底下既紹菜都煮得岩岩好，朋友唔好花膠都話好味。
炸物方面，芝麻雞翼一如所料地香脆，反而吉列炸蠔驚喜地幾鮮甜軟滑，完全唔會水汪汪。 一口芝士咬開係濃稠帶咸香既巴馬臣芝士，外脆內creamy，好味。
榴槤炸彈既榴槤餡唔會太甜，榴槤味香濃，有少少似流心奶皇包既質感。
燒物需時較長，無論熱度定選材都令人滿意。 燒紐西蘭香草羊鞍表面燒得焦黃，啖啖肉滑嘟嘟，好香孜然粉味。
鹽燒牛舌彈牙又有肉汁，再厚切d就更佳。 鹽燒海蝦夠鮮甜，唔洗點醬都夠味。
蒲燒鰻魚即燒至微脆，甘香冇幼骨。 黃金燒帆立貝夠大粒，味道不過不失。
香芒鳳尾蝦以中蝦走油後同雜椒、千島醬同炒，酸酸甜甜好開胃，連伴碟既新鮮芒果粒都好甜。
蒜片和風汁炒牛柳粒夠嫩滑大粒，好有鑊氣。 雖然強調係二人份量，其實只有十粒左右，我自己都食得完。
小炒之中我最欣賞醬炒香辣牛孖寶，牛柏葉同金錢肚夠爽脆就不在話下，最正係用左豉椒猛火快炒，熱辣辣又香口，好有大排檔風味。
受猶如肉蟹粥既圖片吸引，叫左個瑤柱鮮蟹肉粥。 當然現實中隻蟹細左好多，粥底亦只有輕微鮮味、似食緊粟米粥多d，但估唔到原隻蟹仔肉質扎實清甜，仲挖到好多金黃蟹膏添。
食咁多年放題除左自取飲品之外，都未試過場內有大大個buffet區，放滿前菜、熟食、飲品同甜品。
前菜有中華沙律、味付螺肉、茄子同白雲鳳爪等，食到尾都仲有refill，保持到夠凍。
熟食有薯角等炸物，仲有兜菜，由於落單紙已經夠多野食，所以我係冇食既。 唯一有試既係黃金蝦，估唔到半煎炸到連殼都食得，咸蛋黃醬又夠咸香，最重要係選用左鮮甜、成隻手掌咁大既大蝦，啖啖肉好好味，雖然部分比較多油。
飲品佔左成面凍櫃，數量直頭多過一般既便利店。 除左汽水、檸茶之外，仲有唔少韓國特飲同啤油，款式幾齊全。 當日天氣凍，居然仲貼心地有個暖櫃放左熱維他奶，好加分。
甜品細細杯，又係佔左成個凍櫃自取。 當中隨意試左木槺布甸同朱古力mousse，幼滑香甜，比想像中出色。
最欣賞係雪糕櫃足足有9款選擇，除左雪糕杯同大腳板，仲有我最愛既mega脆皮雪糕！ 第一次食mocha味，熟悉中帶點驚喜，畫下圓滿句號。
二百蚊左右既放題，本來冇好高期望，意外地每道菜都好有水準，單售亦唔失禮，絕對值回票價。
