福岡漢堡扒 (厚福街) (Closed)

今日去左尖沙咀食午餐，因為疫情關係，好耐無出去，發現厚福街嘅餐廳變咗好多，經過一間睇落好得意嘅餐廳，枱上面有好多抽油煙機🤣一於入去試吓！我哋兩個人，叫左一份原味和牛漢堡飯，一份東武里牛丼，仲有沙律。跟餐有湯同前菜，泡菜幾開胃。到主菜嚟嘅時候，侍應好細心咁幫我哋擺好抽油煙嘅管，然後解釋比我哋知點煮。個石頭好夠熱，夠力將個漢堡煎得好香口！東武里牛丼唔使自己煮，方便懶人一族，而且都好好食！我地原本打算叫個沙律減低個罪惡感，想健康少少，點知…原來沙律有一個好邪惡嘅配菜，就係忌廉芝士呀❤️呢個食法真係未食過，佢仲加左啲蜂蜜同乾果落去。我地將啲忌廉芝士搽落多士度，超正。好有衝動想喺屋企自製一啲搽麵包，呢個沙律真係值得一試！