地道館車仔麵

Open Now

Now Closed

愛民邨呢個地方，如果唔係工作需要，我諗都冇乜機會過嚟😂。最近兩次上去做嘢，兩次都幫襯碩果僅存嘅黃店地道館車仔麵。第一次好肚餓，食車仔麵驚唔夠飽，於是叫咗個招牌豬扒蝦條蛋飯。叫得招牌，總會有啲期望，呢個飯最特別嘅當然係蝦條，味道就似一條長形嘅炸蝦丸，蝦膠鮮甜，不過肉質略嫌唔夠彈牙；豬扒原塊上，中間切咗幾刀，方便進食，呢個窩心舉動有分加🤗；味道方面，豬扒煎得香口，肉質嫩滑唔嚡口，真心唔錯👍。餐飲我叫咗而家好少見嘅荷蘭谷古，可可味好濃郁，飲得出真係谷古，唔係普通朱古力。第二次終於叫咗車仔麵，我揀咗麻辣豬肚，蘿蔔同魚皮餃，最好食嘅係豬肚，味道偏甜唔太麻辣，煮得又腍又入味，完全冇一般豬肚嗰朕除，非常唔錯；其餘兩個餸就正正常常，無甚驚喜，反而個腩汁好出色，除咗腩味濃之外，湯底入面仲有唔少大大粒牛腩，超正😍。最後想講嘅係，呢度嘅車仔麵每款餸份量都好多，好抵食。