阿土伯鹽水雞 (Closed)

係荔枝角返工，想坐得舒服既來來去去都係得幾個地方，所以今日又行左黎D2。呢間台灣雞想食好多次，今日終於都行埋去喇! 見個 menu 其實選擇唔多，主打都係雞，唔食雞既就唔好諗喇，最後我叫左個＂１人餐＂既胸腿各一半＋任選３個配菜，加拉麵再加左一杯薑母奶茶。因為佢係 a kind of 涼拌既種類，所以兜嘢係唔熱既，啱夏天食，入面包括有雞、西蘭花、芭樂、百頁豆腐、拉麵，揀左阿土醬走辣。Ｄ雞肉係實肉，唔係林肉散肉果Ｄ，質感唔錯，有麻油香味，西蘭花算係爽身，芭樂算幾甜，百頁豆腐個質感其實有Ｄ似魚肉既，成件事係靠個醬，有好輕微既梅子酸味，食緊果時感覺係清新既，但２個鐘過後又其實會覺得好重味。而杯奶茶就嫌佢薑味不足，奶味多茶味少。Lunch 用70蚊食呢餐唔可以話物超所值，只可以話一試無防。