Yau Kee Dumpling

夜晚差不多九點，深水埗買完電子產品，知道呢間食店，開咗一段長時間，但次次路經都未幫襯過，今日剛過完黑色暴雨、及 3 號風球，見堂食人少少就嘗試幫襯。

叫咗全日餐 D 餐其中、「雲耳椰菜鮮豬肉餃上海麵+凍檸茶」，凈食麵 $36元，加凍飲另加 $6元，共 $42 元。

先上一杯凍檸茶，一見到茶底唔濁好清澈，檸檬五片新鮮冇梅，真係同大家樂差唔多水準！坊間好多不論冷熱檸茶，好多都好混濁好苦澀，好多係用沖熱奶茶茶膽溝，根本唔識沖好難飲。難得呢間專做水餃食店，竟然可以沖出一杯，我覺得值 85 分以上水準，難得啊！

比大部份茶記好飲，拍得住大家樂。

雲耳椰菜鮮豬肉餃上海麵，一樣有驚喜，水餃內餡料豬肉新鮮，雲耳及椰菜都好味，椰菜咬落爽脆，上海麵唔會過淋口感唔錯，落上海麵果種豆瓣醬，好食！我見廚房內每出一碗，都用倒數計時器計時，淥嘅時間啱啱好，出品確有心！

雲耳及椰菜香脆，豬肉確係新鮮，上海麵唔會太淋係即淥，冇事先用熱水浸淋準備，爽口好食 !

$36

阿姐尚且有禮，期間見好多人買外賣，證明熟客都唔少。現場唯一希望改善，係希望加部電視，及俾杯清茶或清水，應該會增加到堂食客。下次都會再幫襯，試下其他餃子及小食。

店內堂食環境

內地環境乾淨企理，播三十年前流行香港流行曲，獨欠電視機，幾好坐。

門外餐牌直幅

門口外餐牌