吞POT 雞煲火鍋.住家菜 (山林道) (Closed)

有位好朋友剛剛去完歐洲回來，即約我食飯，佢話好想食下啲熱辣辣嘅火鍋雞煲等，我梗係不負佢所望啦，捐窿捐罅搵好嘢食我最叻！最近知道喺山林道 銀座 38 開咗呢間吞pot雞煲火鍋。 去到電梯大堂簡直就好似酒店一樣，入到店內， 裝修雅緻， 我仲見到有露台，可以睇下開揚嘅景觀之餘，仲可以抖下氣！胡椒豬肚雞煲， 一上枱胡椒嘅辛辣味道已經撲鼻而來，雞煲份量十足，雞肉炆得好淋，雞肉好嫩滑，醃製得夠味，我哋兩個密密食之餘， 仲飲咗兩至三碗靚嘅清雞湯，雞湯真係好鮮甜，喺湯底仲見到一粒粒黑胡椒！雞煲裏面仲有好多豬肚、粟米真係食魚雞煲都已經飽咗一半！十全大補丸，各款手打丸都齊，墨魚丸好彈牙，餡料有黑松露、蟹粉、海膽，真係食到停唔到口！三色魚滑，有鯪魚滑，墨魚滑，蝦滑， 裏面起曬膠， 仲有啲蟹仔喺面，食落卜卜脆，三色滑都很有水準！