十二味 (和富)

Open Now

Now Closed

上次食過十二味啲酸菜魚覺得幾好食，今次就帶個鍾意食辣嘅朋友嚟試吓。呢間個湯比較濃，感覺比較油少少，但係酸度同辣到好平均，所以個湯都幾好飲。因為呢個朋友無辣不歡，而且仲好鍾意食薯粉，所以我哋今次個酸菜魚就加咗薯粉。佢啲薯粉係好闊，好煙煙韌韌，透明嗰一種，朋友話完完全全係大陸食到嗰一種。另外我哋仲嗌咗一個毛血旺，我自己就最主要想食佢個鴨血。啲鴨血厚薄剛好，索晒啲汁，好正。另外佢入邊仲有牛柏葉，啱啱好，夠爽脆。仲有午餐肉，啲午餐肉比較林，可能因為咁會索湯啲。然後仲有豬大腸，豬大腸都洗得乾淨，無異味，亦都炆到好林。最正就係啲豬皮，索曬啲汁，同鴨血一樣咁正。食完啲辣野當然要嗌過冰粉嚟解下辣啦，呢度嘅冰粉係桂花糖冰粉，加咗少少葡萄乾，啲冰粉到煙煙韌韌大大嚿，雪到涼浸浸，解辣之餘更加透心涼。