我哋唔算好肚餓，所以主要都係叫D丸試下
芝士牛肉丸&黑松露蝦丸
牛肉好有濃味，一邀就爆出裡面嘅芝士醬，兩者都幾夾，至於黑松露蝦丸真係食到切細咗嘅蝦肉，黑松露味飄香但唔會勁到入唔到口，我自己覺得呢個程度剛剛好。
皇室魚肚
大大舊飽肚感十足，因為有好多氣孔位，所以放落去淥之後會將湯汁全部鎖住，一咬就會滿口鮮甜濃味嘅湯，加上爽口口感，好似食緊柔軟版嘅豬皮！
精選手切牛肩肉
牛肩肉紋理分明，牛味濃郁又有嚼勁，因為有一定厚度，令牛肉同湯混和嘅時間多咗，味道都更豐富，比起油脂豐腴嘅雪花肥牛，我自己比較喜歡口感類嘅牛肩肉～～
鮮炸響鈴
鮮炸響鈴一上檯就聞到大豆味，每件仲要比坊間響鈴大一倍，食一件已經大滿足！
寬粉條
打邊爐要食個麵先舒暢嘅話就一定要食呢個寬粉條啦～～佢最神奇嘅位係淥熟咗會變透明，口感爽之餘會有煙韌感覺，好似食緊麻糬烏冬，而且佢份量好多，一定食得飽。
杭菊露
用蒸餾方法萃取嘅杭菊露比一般菊花茶更清新甘甜，打邊爐一邊食一邊飲清熱解渴仲解膩，唔喜歡酸梅湯嘅朋友（我）可以考慮下呢杯飲品呢～～
等lift期間發現門口位有個螢幕有好多天燈飛下飛下，影張相打卡都幾過癮。
