呢間食越南菜嘅第一郡係深水埗已經打出名堂，我食過幾次都要排隊，人氣頗高
原來佢係天后都有分店，啲位仲闊落啲添
蟹膏蕃茄湯河粉 ($50)呢個蟹膏蕃茄湯河粉/湯檬完全無得輸，我差不多次次都會嗌
湯底以蟹肉、蟹膏、蕃茄熬成，味道清甜帶點蕃茄嘅甜酸，試得出唔係落咗味精而係真材實料！
配料都十分豐富，包括以蟹膏、蟹肉、蛋漿整成嘅蟹膏餅、扎肉、豬紅、豆卜、蕃茄、生菜、香葉
味道方面，主角蟹膏餅啖啖都充滿濃郁蟹香，豆卜同豬紅吸收晒湯汁嘅精華。扎肉有兩款，一款有黑椒粒，較瘦，爽口彈牙; 一款有肥豬膏，較滑。而且仲落左大半個新鮮蕃茄，厚肉又juicy!!!
牛腩燉蔬菜 ($55)牛腩炆得夠軟嫩夠入味，蘿蔔同薯仔都非常腍;醬汁味道既帶有蔬菜味，又帶有香濃既肉味，酸酸甜甜，有啲似羅餸湯十分醒胃！就算有包有肉，食落都唔覺滯。
法包烤烘得外香脆內鬆軟，點汁食非常之夾！
但要撞正星期六日先有得食~
烤豬軟包 ($38)軟包同樣烘至外脆內軟，但比起上面嘅法包會鬆軟一點，就算冇醬汁點都易咬易入口
餡料方面有咸香惹味嘅嘅豬肉、生菜、芫茜、青瓜、酸蘿蔔絲，一大口落去會食到唔同嘅味道同口感，好有滿足感
牛油果沙冰 ($30) & 芒果沙冰 ($30)牛油果沙冰質地其實比較似奶昔，質地係打至幼滑而濃稠厚身，飲落去啖啖都充滿濃濃嘅牛油果味道，作為avocado粉絲，攰一攰嘅時候飲到真係好似上咗天堂咁架
芒果沙冰奶味同冰感較重，芒果味道唔太突出，不過都十分消暑解渴
食飽飽同老闆娘傾咗兩句，先知道原來佢係越南華僑黎，唔怪得感覺上比出面嘅越南菜較為地道
總括黎講，呢間天后分店都保持到一貫水準，而呢個價錢可以食到有質素地道既越南河，性價比真係好高呢
