順日本料理 (Closed)

收工肚仔餓揾野食，見到有間專賣牛舌既日本料理，當堂醒神哂，衝入去食餐飽。鋪頭細細，但係裝修好日本風，仲有個壽司吧枱。個肚勁餓，點左個厚燒牛舌定食，照燒銀鱈魚定食，廣島蠔鍋外加沖繩風燴豬手，食盡佢。個牛舌飯來到嚇左一嚇，啲牛舌份量多到一個人都未必食得哂，整整有五大塊，而且塊塊厚切！牛舌燒到好香，就算咁厚都唔柴口，都好嫩！不過食量細啲真係要2個人share先得。銀鱈魚肉質鮮嫩，食得出係靚貨，不過照燒汁味道過重，扣分地方。廣島蠔滿滿蔬菜加幾隻肥美蠔，湯汁鮮甜，蠔飽滿但有輕微腥味。沖繩燴豬手十分軟淋，輕輕一咬就骨肉分離，滿滿既骨膠原，惜少少過咸，係美中不足之處。下次來都係要就住叫，食到勁飽先走到，一個牛舌定食加個鍋都足夠2個人食！