鴻啤啤串燒 (Closed)

係尖沙咀行完街有啲肚餓，行行下發現金巴利道好多特色餐廳。其中一間就係呢間食串燒既小店，一入到去燈光暗暗地，好有情調，好適合放工後黎放鬆下。每張枱上面都放左點餐紙，串燒選擇非常多，其中餐牌上寫左餐廳推薦之選，我同朋友就決定試下佢地既招牌菜！首先係燒新鮮生蠔，即叫即燒，咬落去仲熱辣辣架。上面放左蒜蓉，蒜味好香濃，同生蠔配合得岩岩好。生蠔好新鮮，鮮甜多汁，而且價錢唔貴，$25一隻，CP值超高架！除左生蠔，不得不提既係燒芝士年糕！本身我係芝士控所以特別期待食芝士年糕。趁佢仲熱既時候食，芝士溶溶地口感好正，而且芝士味超濃！而且年糕好有咬口，襯托出芝士既香味，好難忘既味道！燒豬大腸都值得推薦！唔似有啲串燒店會燒得好乾好硬，呢間店既豬大腸浸係醬汁上面，好入味而且好淋好易咬。順帶一提，豬大腸既份量真係超多！$42就有好大碟啦！我地仲叫左汁燒雞柳串，雞肉好嫩滑，而且吸左啲汁好入味，燒完唔會好乾，反而保留住啲肉汁，睇得出師傅好用心燒，燒既時間岩岩好。最後想介紹燒雞皮。好多串燒店既雞皮都燒得太燶，甚至燒到有陣炭味，但呢間絕對唔同level，不但唔會太燶，而且燒得脆卜卜！