+886 台味飯桌仔 (Closed)

今日出開嚟做啲嘢，過咗食晚餐嘅時間，變咗要食宵夜，行到過嚟呢頭見到仲有間台灣嘢未閂門，一於就係佢啦。坐低叫咗個小食先，因為太肚餓啦。呢一個滷水大腸，連我平時呢個唔食大腸嘅人都試咗幾嚿。佢都炆到啲大腸好腍好入味，最重要嘅係啲大腸一啲都唔肥，令到我我可以放心咁擺落口。另外叫咗個台南海鮮卷，有蝦同埋墨魚，切成薄片拎去炸都幾香口㗎，但係一定要趁熱食。跟住叫咗個清燉牛肉麵，你唔好睇佢成碗嘢個顏色咁清淡，其實個湯超級夠味。最重要係啲牛肉都炆到好腍，好夠味。而且佢個拉麵真係驚呆了我，因為真係好彈牙，再掛埋啲湯汁，真係超好味。另外見到佢呢度有湯飲，對於我呢個湯怪嚟講梗係要試吓佢啦。叫咗個淮山瓜雞湯，好足料㗎。第一次食番薯係鹹食，味道有幾夾個喎，佢個雞湯有啲似麻油雞淡味版，雞味比較出啲，正。另外仲叫咗個藤椒雞湯，呢個就辣得過癮，辣辣地香香地嘅雞湯，啱晒暖身。最後仲叫咗兩杯台式飲品，分別係凍熱板嘅奶綠，無論係走甜定係少甜都飲到個茶底好香，正。更加正嘅係呢度嘅價錢好貼地，食飽飽都係人均100。