十三座牛雜 (Closed)

早一排師傅無意間見到呢度有一檔十三座牛雜, 師傅心諗會唔會係同北角嗰間一樣呢, 終於前晚幫襯完腸粉皇後, 就即刻黎呢度睇下; 行到埋去人山人海, 但見店面貼晒北角嗰間嘅廣告, 所以應該係同一間; 好唔容易先輪到師傅, 於是今次就要左一串牛雜!仍記得上次喺北角, 師傅要左串牛肚, 都已經覺得唔錯; 所以今次要牛雜, 牛雜有牛腸, 牛肺, 牛膀同牛肚, 個汁真係好香, 而牛雜真係炆得好腍, 其中以牛膀最好味出色, 呢個牛膀堪稱師傅生平食過最好味嘅牛膀, 又腍又入味唔在講, 唔會苦又唔會有異味, 真係好鬼正; 而牛腸亦都好腍, 口感一流, 牛肺份量勁大件, 絕冇搵笨; 牛肚相比下反而顯得更平庸!總括黎講牛雜質素真係超晒班, 而價錢都係八蚊一串, 細盒三十, 大盒就四十八, 而且都幾乾淨, 加上每串牛雜仲會放喺不銹鋼碟上, 然後讓客人自行加辣醬, 甜醬同芥辣, 感覺真係一流; 難得呢區有開番一間, 所以師傅唔使再諗幾時去北角喇! 十三座牛雜真係算得上超班牛雜, 就算一d牛雜麵店都未必有d度嘅牛雜咁好味, 所以笑臉一定會比, 而且一定有下次; 就係咁樣, 兩檔街邊小食就成為左師傅嘅晚餐!