養心殿台式養生鍋 (Closed)

慶祝母親節快樂，帶媽媽黎養心殿食台式火鍋。一坐低即刻揀左湯底先，揀左多人推薦既美人鍋同台式火鍋必吃既麻辣鍋。麻辣湯底超香，叫左小辣，入面已經有幾塊鴨血同冰豆腐，好好食仲會送多一盤鴨血比你自行添加。另一邊美人鍋湯底比較甜，有好多桃膠，烏雞同好多藥材，初初試飲幾啖味道比較淡，但後期越滾d味越出。蘿蔔配麻辣湯底必試！蘿蔔滾兩滾好快已經淋，都幾甜。響玲勁脆，即叫即炸，雖然有d油，但好香口，就咁食都好好食，一定要叫！竹笙比較細條，感覺有d貴，但配麻辣鍋好夾，好難取捨蟹柳正常。炸午餐肉，就咁食好好食，但放入鍋入面個味道又唔太夾，可能炸完太香口了，味道蓋過曬個湯底。手切牛肉，肉味濃，夠淋，不過就唔夠油脂香。同埋價錢貴左d。叫左個餃子拼盤，每款都有兩粒，可以樣樣試d，當中有款係麻辣牛肉餃，無乜麻辣味，牛肉似山竹牛肉，感覺一般。蟹子墨魚滑，足料好食。場內環境算幾好，唔會逼，有好多獨立廂房，感覺良好，不過冷氣再大d就好，總括黎講會再去食。