我同朋友就叫左個沙律做前菜 始終食燒肉會比較油膩 都係食番啲菜打底好啲
沙律汁清新，配新鮮蕃茄確係幾開胃！沙律菜亦無出現我最驚既苦味！不錯的開始
另外重叫左芥辣八爪魚！不過個人覺得芥末味唔夠重，可能係我太重口味....
前菜之中我最中意就係 雞泡魚乾！甜甜地 又香 加埋個醬 好好食！
然後生料就好快上喇。先黎既美國牛小排
油脂分佈平均 一睇就睇得會好化！
係格網上面燒既紋真係好靚
輕輕兩邊都燒廿秒到就食得喇！牛味濃，最緊要係油脂香充斥口腔！ 
然後豚腩肉充黎喇！超薄切既豬肉片 已經有啲鹽係上面。肉質軟稔，不過點解我食到午餐肉味既haha
食左一輪肉就到比較難處理既鰻魚。因為易燶既關係 成日都覺得會燒得唔好，好彩店員樂意幫忙。 燒得好既鰻魚真係超好食 肉夠多汁之餘 皮又勁香脆
中意！
最後一款生料就係我超級期待既緬甸虎蝦😱
因為佢真係超超超巨型呀！
燒個陣好擔心佢唔夠熟 但又驚燒得耐 啲肉老哂唔好食，所以最好都係問下店員應該燒幾耐。
燒完側邊又燒下背面～到我地見到都離哂殻就決定開始喇！一夾起就見到原來連背面都有膏嫁！
蝦肉鮮甜，重點超多膏 食到想流眼淚～～連蝦頭都要食埋 因為真係超甜！
食完咁多肉就以一個冷烏冬作結。不得不提既係 烏冬極煙韌，食得出係靚貨。我同朋友本身飽飽地 但因為烏冬質素奇高 所以都清哂成碟！
日式燒肉呢間的確不錯，可以再戰
