Dào Chéng Taiwanese Restaurant (K11 Art Mall) (Closed)

小妹已有好一段長時間無寫食評喇！但今次可以成功吸引到令到小妹再次食寫評去推薦嘅係喺尖沙咀K11嘅「稻埕飯店」！一開始我們去K11仲諗緊搵去邊間餐廳食晚飯，小妹我就喺openrice搵吓，搵到呢間叫「稻埕飯店」嘅好評都幾多，而且睇到食物嘅照片都幾吸引，所以我們就決定入去食晚飯！喺門口等待店員安排我們入座嘅時候，我們睇到個放喺門口嘅大餐牌有呢個中秋節期間供應嘅「$788四人套餐」：金銀蒜泥五花白肉、福州佛跳牆、宜蘭三星蔥油鷄「例牌」、台灣白肉苦瓜炒美國頂級安格斯牛小排、蔭樹米豆乳鵝仔菜、滿滿骨膠原豬手、滷肉台梗米飯、黑糖薑母鮮奶湯圓！當中我們比較喜歡嘅分別係：金銀蒜泥五花白肉嘅賣相相當吸引，最初以為味道會係普通充滿蒜香味嘅五花肉，點知食落原來入面係有薄薄嘅青瓜片同五花肉一齊捲成，感覺非常爽脆清新，最好係唔好有好油膩嘅感覺！福州佛跳牆係最令我們驚喜嘅，因一開始打開嚟影相嗰陣祇係隨手搵到一隻鮑魚，當時已經覺得都幾大隻，但到分湯嗰陣就越分越驚喜，因無諗到小小嘅燉盅入面會有咁多湯料，除咗有鮑魚之外仲有花膠、海參、金華火腿等等等等⋯⋯真係超足料呀，湯底嘅味道非常芳香濃郁！滿滿骨膠原豬手燜得好腍好入味，肉質相當鬆軟，豬皮嘅質感非常煙韌軟滑，因燜咗有一定嘅時間，所以完全無硬實實嘅感覺！黑糖薑母鮮奶湯圓最初我們以為味道會好甜，但甜度竟然啱啱好，而且仲有桂花嘅清香味，同埋原本以為祇有湯圓，點知發現有埋芋圓，真係覺得好開心！至於宜蘭三星蔥油鷄「例牌」同另外可以用$68優惠價追加「鵝不是鴨肉」例牌嘅味道都相當唔錯，但令到我們有啲啲微言嘅就係擺放得太過側埋一邊，略嫌賣相唔太好睇！至於稻埕牛肉麵就係我們特意另外點，因每次去每一間台灣飯店牛肉麵都係我們必定會叫嚟食，一開始飯咗啖湯，湯底嘅味道超級鮮甜濃郁，牛𦟌肉質係超鬆化軟腍，而且有入口即溶嘅感覺，而且份量十足，麵質亦非常煙韌彈牙，真係值得推介再推介呀！另外喺用餐嘅時候，見到有個電子傳菜員負責送餐出嚟，感覺真係特色同可愛！

電子傳菜員

中秋節四人套餐

稻埕牛肉麵

金銀蒜泥五花白肉

鵝不是鴨肉

黑糖薑母鮮奶湯圓

滷肉台梗米飯

滿滿骨膠原豬手

蔭樹米豆乳鵝仔菜

台灣白肉苦瓜炒美國頂級安格斯牛小排

宜蘭三星蔥油鷄「例牌」

福州佛跳牆