發哥粥底海鮮火鍋 (Closed)

觀塘打邊爐我本身鍾意去倫哥，而家發哥係同佢並列榜首。發哥主打海鮮粥底火鍋，佢得夜晚係做火鍋㗎咋，日頭係360冰室嚟。晚市有3個選擇，我同友人揀嘅係龍蝦餐 $288/位，包咗勁多嘢，有涼菜2碟、燉湯、蒜蓉泰醬焗青口、鮑魚、海鮮、牛肩肉、每檯8款火鍋配料、竹蔗水同汽水任飲。醬料費要每人$15。涼菜兩款都有少少辣，超醒胃。燉湯真材實料，不過有啲太油。焗青口配上蒜蓉同泰式辣醬，味道好香。竹蔗水係自家製，有得任飲㗎，健康過飲汽水多多聲。鮑魚有得揀新鮮定冰鎮，我就揀咗冰鎮，我都係第一次點胡麻醬咁食，彈牙之餘又帶芝麻香，好正。海鮮好新鮮，叫龍蝦餐每位有半隻龍蝦，有埋我鍾意食嘅貴妃蚌同蟶子，餐廳有列明每款海鮮嘅建議烹調時間做參考。我淥嘅龍蝦剛剛煮熟，肉質一啲都唔霉，仲好嫩滑𠻹。牛肩肉睇色澤都已經好吸引，牛味好出，脂肪唔算好多，肉嫩。火鍋配料有五十幾款選項，每檯可揀8款，其中最驚喜係有得揀花膠，識嘆嘅朋友一定唔可以錯過。食到咁上下個粥已經吸收哂精華，睇色水都知，食落帶鮮甜味，滿足。