一家人都好耐冇食過潮州菜，一於去試吓！
💛海馬友 $188
講到潮州海鮮🐟蒸海馬友係其中一道有名菜式。
師傅以傳統嘅潮式做法，蒸出嚟嘅魚肉，光鮮白淨，肉質會結實。入口嫩滑，唔會鬆散。因為魚油夠，所以味道特別鮮甜，有種獨特嘅甘香，完全唔腥👍🏻沾埋醬汁，更加鹹香惹味！
💛汕頭咸菜生蠔煲 $198
一上枱就聞到好開胃嘅咸菜酸香。湯色奶白金黃，入面有飽滿嘅生蠔同爽脆嘅咸菜。😮
🦪生蠔勁大粒，肚仔脹卜卜！咬落去裡面依然好嫩滑，保留到蠔嘅鮮甜。咸菜鹹中帶酸，味道清爽。食完成個人暖笠笠，好舒服，係冬天嘅好選擇。
💛五指毛桃啫雞（半隻） $168
一揭開蓋就聞到好濃郁嘅五指毛桃香味🤤
雞件斬到細細件，用瓦煲猛火啫到乾身，加埋薑同蒜頭一齊爆，好夠鑊氣！雞肉表皮焦香，肉質嫩滑。醬汁濃郁，用嚟送飯真係一流。
💛滷水鵝件 $135
首先聞到陣滷水香味，八角、花椒呢啲香料味好出，帶少少甜。鵝件連皮帶肉，滷得幾入味。鵝皮食落有彈性，唔會太軟或太韌，下面嘅脂肪層唔會太厚，所以唔會覺得膩。至於鵝肉肉質實淨，有咬口，唔會太嚡。
