一坐低未叫嘢食已經送上酸酸味味的開胃小食，連啲茶都好飲過人，但我唔知呢個係乜嘢茶。叫咗呢度幾個馳名小菜，包括「福建三寶」：莆田扁肉湯、百秒黃花魚、莆田滷麵。
扁肉湯($22/位)好好味，有好多小餃子，個餡有菜有肉，睇咗啲介紹先知，原來個皮係用肉來做嘅，經過12,000次嘅槌揼而變成「餃子皮」，所以食落好有口感，真係估佢唔到！
一鍋湯四個人飲都有好多碗。
黃花魚($78)就好大條，佢話用100秒就蒸熟一條魚，所以一啲都唔會過火，魚肉好嫩滑，亦有魚味。
另外個莆田滷麵($88)係同事推介，佢寫住有12種食材，湯濃料足，確實又幾好味，個湯少少傑身，有蝦、蜆、菇、菜、肉碎等等嘅餸，而且份量不少。
另外試咗兩個前菜：滷水嫩豆腐（$52）、蝦苗伴紫菜（$55），嫩豆腐有啲醬香味，豆腐煮淋但唔會爛！蝦苗伴紫菜好特別，啲紫菜好似有少少醋味，好開胃。
仲有一個芋香棒棒，超濃郁嘅芋頭味，外層炸而不油，外脆內軟。
剛好呢期又做緊蟶子promotion，所以亦叫咗一個蒜蓉蒸蟶子($109)。一碟有成十幾隻，用蒜頭蒸好香，超惹味！
我哋最後仲叫咗兩個甜品，包括酥炸冰心榴槤（ $45 ），同埋桂花陳皮燉雪梨($36)，兩個都好好味。酥炸冰心榴槤，係將一舊榴槤蓉雪到冰咁實，然後撲粉去炸，再加上一啲醬汁，榴槤味超香濃，好好味！
燉雪梨就相當清甜清潤，一定受女士喜愛！
今次我哋散叫，但其實佢有好多唔同套餐，二人餐四人餐六人餐都有好多選擇，而且價錢唔貴，份量又多，我會再返嚟食的！
