佰天火鍋

Open Now

Now Closed

今晚真係好開心！我哋一班朋友去咗柴灣漁灣街市熟食中心一樓嘅佰天火鍋，享受咗一餐無敵美味嘅牛雜煲。平時廿幾蚊一串都係得幾件，今次可以任食，感覺真係好正，大家食得好過癮！牛雜煲味道濃郁，牛膀、牛腸、牛腩、牛肚、牛筋、牛肺等，全部都煮到啖啖入味，口感滑嫩，完全冇腥味。再加上老闆特製嘅辣醬汁，好味到想再嚟多碗！點嘅醬爆雞煲同烤魚煲，味道一樣出色。老闆見我哋人多，雞煲上個加大煲，烤魚兩大條，份量超足。雞件肉質鮮嫩，烤魚皮經過烤焗，搭配醬汁，特別好食！火鍋方面更加不得了，居然有花蟹，平時任食嘅比較少有，仲有中蝦、生蠔、鮑魚、鮮魷、九肚魚等，份量又足，質素又高。特別係肥牛，嫩滑又有咬口，真係值回票價！老闆話下星期一會推出羊腩煲，每位加$20就可以享受，聽到我哋都忍唔住想再約返嚟！如果你都鍾意牛雜煲、雞同羊腩煲，真係唔好錯過佰天火鍋，價錢合理，食物又好，絕對值得一試！