6
1
作為火鍋放題控，今次真係試到唔捨得走～唔單止無限時任坐，仲誇張到有超過200款美食，除左基本火鍋配料、由刺身、即撈海鮮到串燒、甜品、飲品樣樣齊，仲要一人一個湯底唔使爭，真心超抵！
我哋揀咗C餐，一坐低就衝去即撈海鮮區，大頭蝦生猛到彈水花，仲有海蝦、蜆仔游緊水，即撈即煮鮮到爆燈！自助海鮮吧更加係估佢唔到咁多款，生蠔肥嘟嘟、鮑魚彈牙、花蟹爆膏、瀨尿蝦仲有膏㗎！蟶子同青口都係任攞，海鮮迷保證尖叫～
澳洲M8和牛都係任食之列，雪花分佈靚到好似大理石紋理咁，油花均勻細密，牛肩胛肉味濃郁得嚟帶淡淡甜香，輕輕一淥幾秒就食得，入口即化唔黐牙；牛小排切得厚薄適中，脂肪比例完美，咬落去牛油香爆棚，淥完個湯底都充滿濃郁牛香！黃瓜條部位比較罕有，肉質超級軟嫩，仲帶少少嚼勁。
刺身叫左三文魚，三文魚厚切油潤。另外仲有珍寶赤蝦、北寄貝、帶子等
串燒都叫左幾款，鮑魚炆得軟淋入味，另外仲試左台灣腸、雞心、翠肉瓜等
甜品花多眼亂，樣樣都想食，可惜個胃已經塞唔落，最後試左法式焦糖燉蛋，表面脆糖咔嚓響，另外仲有宇治抹茶芭菲、楊枝甘露、軟雪糕、朱古力心太軟、芒果布甸等等！
飲品仲有自家製菊花茶同檸檬茶，唔係求其開粉沖，真材實料！
