番本日式放題 (Closed)

今晚係好朋友生日，我地幾丁友去左旺角番本食晚市放題。最近番本推出左升級優惠，每人加多八十幾蚊就有羊架，加大帆立貝、大大條海蝦、劍魚、池魚刺身食。因為朋友們都鐘意食羊架，呢個優惠就岩曬我地。首先我地叫左d頭盤，有各類刺身，壽司，手卷。值得一讚係三文魚刺身夠曬鮮甜肥美，大大舊，之後仲多叫兩轉刺身,另外吞拿魚拖羅手卷都幾滋味，但係吞拿魚既份量可以再多少。之後上枱既係羊架，同升級既食物。呢到既羊架放左孜然粉去左羊肉既羶味，另外提供芥末醬，仲有一種極少餐廳會提供既-薄荷醬。相信識得食羊架既食家都會鍾意羊架配薄荷醬黎食（起碼我會係咁）薄荷醬有種清香味，可以中和羊肉既羶味，真係好yummy。所以我建議店家可以落少d孜然粉，咁樣會薄荷醬既味會突出d。我地之後再叫左d炸物，天婦羅。炸物中都係炸芝士年糕最好味。年糕拎上枱個陣剛剛暖，咬落去d芝士咇曬出黎,配合年糕既煙韌，好食到再想複桌。最後再配上人蔘雞湯，濃濃既雞湯加上有真蔘味，喺冬日喝上暖暖既湯水，成個人都有番元氣。