食晚飯時間黎講，呢間餐廳真係唔算多客，不過睇睇MENU，呢種中高價既日本餐廳平晚咁既人流都屬正常，而且大角嘴又唔係尖沙嘴，地理位置都幾輸蝕，不過人都入咗黎，都冇理由見佢少人怕中伏就走既…
呢度既內部裝修都幾有日本feel，特別鍾意佢呢個畫咗花既屏風，配埋波波燈真係好日本風情畫XD
人唔多既關係，上菜速度都真係幾快，啱晒做咗成日嘢饑腸轆轆既我地! 從starter開始，每道菜份量雖然唔多，但係都算係幾大路口味，亦都好啱我地胃口~ 有生既，有熟既，但係而家呢種天氣黎講我都係比較鐘情於呢兩個鍋物
清酒煮蜆既蜆量撐滿晒成個鍋，同其他款式相比覺得呢道比較份量多，酒味香濃，未埋黎已經聞到，所以期望非常之高，蜆肉漲卜卜，大大粒，食落唔韌唔腥而且冇沙，酒味香，後勁強，味道變得好有層次，認真唔錯!
至於小火鍋，雖然配料唔係多，但佢既牛肉有少少越式生牛肉feel，喺個鍋度仲係半生熟，所以食落好稔，而且冇乜筋，但係件數唔多而且亦都唔大件，有少少唔夠喉~ 菜類方面既椰菜(定唔知黃芽白)真係好甜，同果時喺台灣食果種涮涮鍋好似~ 不過其實說到底，雖然個鍋味道不錯，而且好適合呢種天氣，但係菜式上煮法上似乎就唔算太特別~ (其實火鍋唔特別就一定架啦XD)
不過點都好，成個用餐體驗我係相當滿意既~ 下次都會考慮再黎過=]
