晨咁早就去旺角朗豪坊食元氣，
大概晏就5點就去食了。
一來因為朋友心心念念要食元氣壽司好耐，
二來係怕食飯時段會好多人，驚有排等。
果然早去有著數，唔使等直接入。（食完個陣見到出面多左好多人等緊）
本來係安排坐卡位，但為免要同其他人搭枱，加上有空位，朋友就想轉坐迴轉壽司個邊。
同店員講完，佢地都好爽快比我地轉。
先講講迴轉壽司，
見佢轉咗好耐都係個幾款卷物、壽司，
熟蝦、芥辣八爪魚、鰻魚、三文魚腩等壽司老是常出現，
等到2046都未必有想要個款。
加上迴轉壽司個樣偏頹，唔太新鮮，感覺轉咗好多次，已經無乜光澤咁。
所以多數自己落單算。
左至右：花之戀、吞拿魚壽司、腐皮壽司、牛油饅魚卷物。
花之戀算大件，有3大塊三文魚包住。
我嘗試過挑戰一口食，最後係失敗咗haha。
三文魚都肥美嘅，食完花之戀係幾滿足。
腐皮壽司甜甜地，無乜大問題。
由於吞拿魚壽司＆牛油饅魚卷物最後係由友人獨自食完，
所以我就唔評價了。
另外都有食炙燒黑椒三文魚壽司，完全食唔出有黑椒或者辣味，
基本上比醬汁味道掩蓋哂。
炙燒牛油赤海蝦壽司都唔錯嘅，牛油香好濃郁，蝦肉算彈牙。
拎咗碟筋子壽司，見網上好似好多人食，幾特別咁，
原來啲三文魚卵係痴埋，唔會散開（雖然後來知點解之後覺得有點接受唔到haha）
食落口感都有趣同豐富嘅，不過無想似中好juicy好爆汁嘅感覺。
炸蝦卷
呢款真係元氣必點之選，炸蝦酥脆香口，加上酸甜沙律醬令卷物更惹味。
小食叫咗兩款：芝士薯條、炸雞翼
芝士薯條嘅芝士醬係另外用碟盛載，頗貼心。
芝士醬有加少許香料調味，芝士味好突出，夠鹹香，應該係車打芝士醬。
但自己對車打芝士唔太有興趣，所以好少蘸醬。
而薯條真係值得一讚，唔係m記或者快餐店普通油炸薯條，
而係好似炸薯角嘅變奏版，色澤同味道都好似薯角，好特別。
