經過呢間野，覺得D野食幾吸引，所以就入咗去啦！
正常平日下畫兩點幾三點都係大家要返工既時間，所以入到去好少人，我地可以揀位坐。座位與座位之間都算闊落，店鋪燈光柔和，牆身係紅磚裝飾，整體讓人感到舒服。
坐底睇MENU，本身想睇下有冇下午茶揀，原來下午茶就係午市打個八折（加一），咁都抵喎。
其實自己好想食扒，不過餐廳名咁日式，令我覺得好似食蛋包飯比較適合D，所以就叫咗蛋包飯。
我見有紅菜頭咁特別，所以我叫咗個北海道牛乳紅菜頭蛋包飯配牛柳粒（日式咖喱汁），我朋友就叫北海道牛乳蛋包飯配吉列魚柳（和風蕃茄汁）。
每張枱都有一支水俾客人自己黎，我同朋友都覺得個水杯好靚。
先黎個是日餐湯同埋餐包。問職員，職員話個餐湯係蒜蓉湯，我飲落去，發現有粒粒薯仔，都幾好飲既。個餐包係多士搽了蒜蓉醬和牛油，都係我鍾意既！
朋友既北海道牛乳蛋包飯配吉列魚柳（和風蕃茄汁）上枱啦！外觀好睇吸引，朋友話味道一般！
我碟北海道牛乳紅菜頭蛋包飯配牛柳粒（日式咖喱汁）都黎啦！加咗紅菜頭，個顏色變咗粉紅色，感覺有D奇怪，不過味道冇咩唔妥。
切開蛋包飯，入面配有白飯，本身冇咩味，一定要配搭醬汁去食，日式咖喱汁唔辣，味道幾好。粒粒牛柳粒煎得好香，食落去好正，但分量略嫌偏少。
整體黎講，食物一般，可能其他招牌菜會比較好味啩～
食到咁上下，職員話每個套餐都送Haagen-Dazs雪糕，問我地要朱古力味定係士多啤梨味，我地兩個都叫咗士多啤梨味，夏日炎炎食雪糕，真係冇得彈啊！飲埋餐飲，一直係到傾計，坐咗勁耐先走。悠閒既下午就係咁～
