八麵玲瓏 (Closed)

又到晚飯時間，又唔想食得太飽，食碗粉麵算快靚正嘅選擇，今次經過兆和街，都有幾間嘢係食麵嘅，但最後揀咗「八麵玲瓏」，除咗睇落都多選擇外，D餸料又啱口味，而且一個麵餐都係$26（包嘢飲），價錢又夠大眾化，咁今餐就可以慳慳哋！我要咗個五香豬蹄肉米線，睇樣似平時食開嘅鹵水牛展咁，食落同食分蹄又差唔多，睇番個餐牌介紹，可以話係個燻過嘅分蹄，老實講就真係唔係好覺得有煙燻味，但食落比分蹄煙韌D，而分蹄肉身就爽口D！太座就揀咗個招牌鎮江肉排上海麵，酸甜味做得幾好，兩種味食得到而又唔會太嗆喉，佢個餐牌亦有介紹個肉排點整，係用鎮江陳醋、海鮮醬、酸梅醬醃製，酸甜得哩帶有濃香嘅醬料味，係個人嫌D肉排稍為炆得過咗火，肉質鬆身得滯，較為腍，少咗份肉質嘅質感，反而個上海麵有驚喜，如果點上海麵要等成5-10分鐘，因為係即拉，驚喜唔係食落彈牙爽口，而係麵身咬落有煙煙韌韌之感，有嚼頭，幾得意，真係不妨一試！後尾因為都見佢抵食，又再幫襯多一次，哩次試咗個福建三寶米線，三寶係福州魚丸、福州燕丸、福州肉丸。魚丸即係好似D貢丸咁，外層彈牙嘅魚蛋包住豬肉碎餡，真係做到肉汁四濺，而且豬肉餡調味幾夠，Good！燕丸就話用蕃薯粉搓皮，再