江湖小棧

Open Now

Now Closed

細個食過豬油煲仔飯一直諗諗不忘，但現代人注重健康，豬油煲仔飯已經買少見少，早排上網睇到呢度有豬油煲仔飯，即刻決定去試下。 8點黎到，等左15分鐘就入得，舖頭裝修以金庸武俠背景做主題，連餐牌都係用上乘武功秘笈做封面，好棧鬼。等左3個字左右，首先上菜嘅係牛舌串燒，一串5粒，燒得好好味，好香口，非常惹味。之後就到主角煲仔飯出場，我order左個三拼煲仔飯「臘腸，雞，窩蛋煲仔飯」，我比較鍾意食飯焦所以焗多左陣先打開蓋，之後將豬油同鼓油淋上面搞暈，香噴噴，令人食指大動！啲飯可以乾身啲，不過整體已經好唔錯，有飯焦，啲雞都幾滑，臘腸食落幾甜，似榮華，呢個組合好正，成煲飯比我幾分鐘掃晒落肚，正！好耐冇食到呢個質素嘅煲仔飯。煲仔飯咁heavy, 都要叫碟菜食下，碟燒韭菜就不過不失，唔油，但偏乾同韌用黎送都煲仔飯不錯嘅。