豐鍋日式涮涮鍋 (Closed)

要打邊爐打得安心，一人一鍋安全啲，喺附近見客，順便食埋飯，見呢間打邊爐係一人一鍋，價錢亦唔算貴，Prime grade 牛肉任食都只是$228。呢個餐牛肉及黑豚肉任食任點，其餘食物、蔬菜及飲品等自助形式，款式唔算多，但係有啲特別食材，質素亦高於其他地方，每次加牛肉時都好快手，服務好。我揀豆乳鍋而我同事揀鮮茄湯，兩個湯底其實都唔錯，當然我個人都係覺得豆乳鍋好啲，感覺比較清甜，更能帶出肉嘅鮮味。Prime 牛肉唔會好肥，只有少量脂肪，肉質淋牛味濃，煮 1-2分鐘最好，一啖一片，我哋兩個前後總共食咗12碟牛肉。黑豚肉亦有質素，唔會鞋。雞肉、貢丸、芝心丸、仿干具燒、炸魚腐及白魚蛋都係我嘅至愛，當中我最欣賞白魚蛋，結實又彈牙。蔬菜類有少見嘅羽衣甘藍及冰菜，原來用嚟打邊爐都幾夾。甜品有海大綠豆沙下火及 雪糕，飽肚又滿足。