話係誠意小店 又幾有特色 就諗住去試下
其實黎最主要都係試佢嘅火山石牛扒
8點鬆啲黎到 叫咗一個吉列牛 一個肉眼扒
店員表示肉眼扒賣曬 推介今日special安格斯
我表示ok
等上菜等咗半個鐘嘅時候 我地懷疑係漏單
就問店員會唔會係唔記得落單
疑似係老闆娘嘅姐姐話唔係漏咗
而係食材重頭製作需時 要等多15分鐘
無奈地唯有繼續等
隔一陣有另一店員黎話肉眼賣曬 叫我地轉安格斯
我地表示一早已經講咗要安格斯
點知轉個頭又有另一個店員黎同我地講同一番說話
此時我地已經覺得奇怪
明明一早話咗轉安格斯
點解過半個鐘之後又過黎問？
咁即係根本一開頭就無落單
第三次叫完我地轉安格斯後一分鐘內已上菜
又話食物重新製作需多15分鐘？
為何啱啱問完咁快可以上菜？
等咗大半個鐘大家都已經好肚餓了
我叫嘅安格斯簡直可以話係難食
肉質好差 有渣 切得好厚 咬落好韌
我以為自己燒得太熟 但無論點燒都係好韌
根本係肉本身唔得
咬極都成口渣
我order白飯亦照比稻荷飯我
等咗咁耐換來嘅係咁樣嘅食物
真係好失望
另一份吉列牛就好啲不過不失
老闆娘態度好好 有講唔好意思 話係今日人多
但我亦覺得如果人客係超過咗佢地handle到嘅上限
不如接少幾個客/暫不開放樓上 做好啲食物質素先
無謂啱啱叫做出咗名就做差曬食物質素 令人唔會食第二次
成餐$406蚊 我認為咁嘅價錢咁嘅質素實在唔值
我住港島 呢個價錢都可以食到塊decent嘅牛扒
睇得出老闆娘係有心做好 但仍有進步空間
睇返大埔group嘅post 有谷友之前留言話等咗40分鐘先上菜
店員回覆解釋話上咗大埔group多人去所以咁
希望店家正視呢個問題增添人手
免得個個都只係去嘗鮮 留唔住顧客
