晚餐一律為full course dinner set，$298中高價位，但實際上dishes好大份，絕對物超所值！
店員悉心介紹每樣菜嘅特色，更提到呢度嘅Iberico Ham係由餐廳有份投資嘅西班牙農場直接購入。橡果豬一向價值不菲，所以即使要加錢都不惜一試最好嘅48月熟成。
熟成時間夠長，ham自然富油脂甘香而唔會過鹹。
油香滿溢嘅iberico ham食落甚至有啲似芝士，配蒜蓉包一流。
是日餐湯以多種菇菌打成，幾鍾意廚師用料嘅比例，忌廉唔會太多，所以湯滑得嚟菇香濃陏。而且保留咗好多菇粒，令湯層次更豐富。
食豪啲可以加多個seafood。
炒帶子並無過份調味，忌廉帶出帶子鮮甜。而且帶子僅僅熟，特別彈牙爽口同多汁。
配埋炒至焦糖化嘅洋葱一齊食就會香、更甜。
而我就比較鍾意呢一道蝦。廚師善用Iberico Ham切出嚟嘅脂肪，爆炒迫出油份，用嚟製作呢一道鹹香味十足嘅炒虎蝦。
蒜片又香又甜，令整道菜生色不少。虎蝦爽口多肉，炒得好香。
配埋鹹香但甘甜嘅臘肉腸就更提香。
餐廳嘅沙律同薯條係任添，水準唔錯毫不馬虎，但成個set份量係按成年男士嚟定，所以已經夠晒豐盛~
燒濕熟成美國牛肩排配醋青醬嘅牛肩排以唔少黑椒粗粒調味，所以每一塊都好香，亦十分Juicy。
配上清新嘅醋青醬更突顯到牛汁同油脂香。
香煎法國鴨胸配香橙蜜糖汁嘅脂肪甘香引人入勝。鴨胸脂肪煎至爽而不膩，滲出油香，令鴨胸味道更濃陏。
配上甜甜嘅醬汁，令鴨胸外皮嘅焦香更加突出。
餐廳上餐次序依足禮儀，服務一流，同客人有唔少互動。
新張期間未能兼顧甜品，但亦有Haagen-daz雪糕/芝士拼盤可以揀。Forkers夠晒cozy，無論一班朋友定情侶嚟都好可以享受用餐時光。期待之後餐廳推出自家製甜品~
