同呀爸呀媽三個人叫咗兩個黃金套餐，一個鑽石套餐。其實望落去餐牌嘅分別就唔大，但係老闆話俾我哋聽鑽石套餐每一樣海鮮都係比較大份同埋比較靚嘅，所以我哋就試吓鑽石套餐。其實鮑魚同埋龍蝦都真係更加好味，俾多100真係好值！
望落去已經超級吸引，所有海鮮都係好新鮮咁
所有野都有人幫我地蒸，而且有哂計時，完全唔擔心會過咗火候，讚！
呀媽高度讚賞奄蟹仔，佢話好鮮甜好有海水味喎，同埋其實都有唔少膏㗎！
龍蝦我覺得都好正，啲肉好彈牙，又好容易撕啲肉出黎，老豆就話388套餐嘅龍蝦正好多，啲肉勁實，唔同層次，正過係酒樓食嘅冰鮮龍蝦多多聲
其實食完厚肉龍蝦已經有啲飽，但係接落黎嘅貝殼類都一樣冇令我地失望，我自己就幾鍾意北寄貝同埋元貝，好鮮甜
仲有海蝦都非常好食，彈牙厚肉！一咬就知上碟前仲係好生猛。
老闆話我咁孝順帶呀爸呀媽黎食飯竟然送咗一碟安格斯牛肉片俾我地
勁好人！牛味非常濃郁，不過就係瘦咗少少。
飽到嘔之後仲有得食蔬菜，因為全部都好解膩，本身又甜，一粒鹽都冇放過都照樣好味！
估唔到個粥底先係俾我地最多驚喜嘅餸！所有海鮮嘅精華都滴哂落去，飲落去就食到海水嘅味道！正，每人食咗2碗都仲有，太好味唔想哂所以就打包返屋企食嚕
不過都建議一日內就好食哂啦 唔係就會有腥㗎啦呀爸呀媽食得好開心，值得再有下一次！
